દયાબેન તરીકે જાણીતી દિશા વાકાણીએ ૨૦૧૭માં મેટરનિટી લીવ (પ્રસૂતિ રજા) માટે ‘તારક મહેતા કા ઉલ્ટા ચશ્મા’માંથી બ્રેક લીધો હતો. તેઓ બે બાળકોની માતા બન્યા પરંતુ શોમાં પાછા ફર્યા નહીં. હાલમાં, તેઓ અભિનયથી દૂર છે અને ઘર તથા બાળકોની સંભાળ રાખવા પર ધ્યાન આપી રહ્યા છે.
શૈલેષ લોઢાએ શોમાં તારક મહેતાની ભૂમિકા ભજવી હતી. અસિત મોદી સાથેના તેમના સંબંધો પણ બગડ્યા હતા; ફીને લઈને નિર્માતાઓ સાથે તેમનો વિવાદ થયો હતો. શો છોડ્યા પછી, તેમણે ‘વાહ ભાઈ વાહ’ નામનો અન્ય એક શો હોસ્ટ કર્યો અને ‘એડવોકેટ અંજલિ અવસ્થી’નો પણ ભાગ બન્યા. હાલમાં, તેઓ કોઈ પણ શો સાથે જોડાયેલા નથી.
જેનિફર મિસ્ત્રી બંસીવાલે નિર્માતા અસિત મોદી સામે ગંભીર આરોપો લગાવ્યા અને ત્યારબાદ શોને અલવિદા કહ્યું. શો છોડ્યા પછી તેમને કામ મેળવવા માટે સંઘર્ષ કરવો પડ્યો છે. એવું કહેવાય છે કે તેમણે તેમની કારકિર્દીમાં મુશ્કેલ સમયનો સામનો કર્યો હતો. હવે તેઓ સોશિયલ મીડિયા ઈન્ફ્લુએન્સર છે અને રમુજી વીડિયો બનાવે છે.
ગુરુચરણ સિંહે 2018માં ‘તારક મહેતા કા ઉલ્ટા ચશ્મા’ને અલવિદા કહ્યું હતું. તેમણે પોતાના પિતાની સંભાળ રાખવા માટે બ્રેક લીધો હતો. ત્યારથી, તેઓ અન્ય કોઈ શોનો ભાગ બન્યા નથી. આજકાલ, તેઓ દિલ્હીમાં રેસ્ટોરન્ટ ચલાવે છે.
તારક મહેતા કા ઉલ્ટા ચશ્મા’માં અંજલિ મહેતાના પાત્રથી લોકપ્રિય બનેલી અભિનેત્રી નેહા મહેતા શો છોડ્યા બાદ પણ એક્ટિંગ અને થિયેટર ક્ષેત્રે સક્રિય છે. હવે તે લગભગ પાંચ વર્ષ બાદ ટીવી પર કમબેક કરી રહી છે. નેહા મહેતા નવા ટીવી શો ‘ઇત્તી સી ખુશી’માં કાઠિયાવાડી માતા હેતલની ભૂમિકા ભજવતી જોવા મળશે. આ ઉપરાંત તે ગુજરાતી થિયેટર અને વિવિધ સ્ટેજ શોમાં પણ સક્રિય છે. જોકે, શો છોડ્યા બાદ પેમેન્ટને લઈને પણ નેહા મહેતા ચર્ચામાં રહી હતી. અભિનેત્રીએ દાવો કર્યો હતો કે ‘તારક મહેતા કા ઉલ્ટા ચશ્મા’ છોડ્યા બાદ તેની છેલ્લી 6 મહિનાની ફી હજુ બાકી છે અને તે આ પેમેન્ટ મેળવવા માટે પ્રયાસ કરી રહી છે.
