:રોહિત શેટ્ટીની સુપરહિટ કોમેડી ફ્રેન્ચાઈઝીની આગામી ફિલ્મ ‘ગોલમાલ 5’ ને લઈને સિનેમા જગતમાં ભારે ચર્ચા જાગી છે. આ ફિલ્મમાં બોલિવૂડના ખિલાડી અક્ષય કુમારની ધમાકેદાર એન્ટ્રી થવા જઈ રહી છે, જે આ આખી ફ્રેન્ચાઈઝીને એક નવા જ લેવલ પર લઈ જશે. અક્ષય કુમાર બોલિવૂડના સૌથી મોંઘા કલાકારોમાંના એક છે અને તેમના જોડાવાથી ફિલ્મનો ક્રેઝ બમણો થઈ ગયો છે.
આ મૂવીમાં તેઓ કોઈ હીરો નહીં પરંતુ એક કોમિક વિલનની અનોખી ભૂમિકામાં જોવા મળશે, જે દર્શકોને હસાવી હસાવીને લોથપોથ કરી દેશે.ફિલ્મમાં અક્ષય કુમાર અને મુખ્ય અભિનેતા અજય દેવગન વચ્ચેની ટક્કર જોવા મળશે, જેને પ્રખ્યાત કાર્ટૂન શો ‘ટોમ એન્ડ જેરી’ ની ધમાચકડીથી પ્રેરિત રાખવામાં આવી છે.
આ રોલના શૂટિંગ માટે અક્ષય કુમારે રોહિત શેટ્ટીને માત્ર 18 થી 22 દિવસનો જ સમય આપ્યો છે. ફિલ્મના અન્ય કલાકારોની સરખામણીમાં આ દિવસો ખૂબ જ ઓછા છે, તેમ છતાં અક્ષય કુમાર આ ટૂંકા શૂટિંગ માટે અંદાજે 35 થી 40 કરોડ રૂપિયા જેટલી મસમોટી ફી વસૂલ કરી રહ્યા છે, જે અજય દેવગનની શરૂઆતની ફી કરતાં પણ વધારે હોવાનું કહેવાય છે.જોકે આ આખી ડીલમાં એક બહુ મોટો ટ્વિસ્ટ છુપાયેલો છે જે અજય દેવગનને ફાયદો કરાવશે. બોલિવૂડના અન્ય સુપરસ્ટાર્સની જેમ
અજય દેવગન પણ આ ફિલ્મમાં ‘પ્રોફિટ શેરિંગ’ એટલે કે નફામાં ભાગીદારીની શરતે કામ કરી રહ્યા છે. આનો અર્થ એ થાય કે ‘ગોલમાલ 5’ બોક્સ ઓફિસ પર જેટલી પણ કમાણી કરશે, તેમાંથી એક મોટો હિસ્સો અજય દેવગનના ખિસ્સામાં જશે. ‘ગોલમાલ’ બ્રાન્ડની લોકપ્રિયતા જોતાં આ ફિલ્મ બમ્પર કમાણી કરે તેવી પૂરી સંભાવના છે, જેથી લાંબે ગાળે અજય દેવગન અક્ષય કુમાર કરતાં પણ વધુ પૈસા કમાઈ જશે.જો અક્ષય કુમારની અગાઉની ફિલ્મોની ફીના ગણિત પર નજર કરીએ તો, તેમણે પોતાના કરિયરની સૌથી વધુ 145 કરોડ રૂપિયાની ફી ‘બડે મિયાં છોટે મિયાં’ માટે લીધી હતી, ભલે આ ફિલ્મ ફ્લોપ રહી હતી. આ સિવાય ‘સ્કાય’ અને ‘જોલી એલએલબી 3’ માટે તેમણે 70-70 કરોડ રૂપિયા ચાર્જ કર્યા હતા. જ્યારે પોતાની છેલ્લી રિલીઝ ફિલ્મ ‘ભૂત બંગલા’ માં તેઓ પોતે પ્રોડ્યુસર હોવાને કારણે ફી ઘટાડીને 50 કરોડ કરી નાખી હતી.
આ તમામ ફિલ્મોની સરખામણીએ જોવામાં આવે તો અક્ષય કુમારે ‘ગોલમાલ 5’ માટે પોતાના સ્ટાન્ડર્ડ કરતાં ઓછા પૈસા જ લીધા છે.અક્ષય કુમાર અને રોહિત શેટ્ટીની આ જુગલબંદીવાળી મલ્ટિસ્ટારર કોમેડી ફિલ્મ ચાલુ વર્ષના અંતમાં એટલે કે 31 ડિસેમ્બર 2026ના રોજ સિનેમાઘરોમાં રિલીઝ થવાની ચર્ચા છે. વર્ષના અંતે ન્યૂ યરના અવસરે રીલીઝ થનારી આ ફિલ્મ બોક્સ ઓફિસ પર કમાણીના તમામ રેકોર્ડ તોડે તેવી આશા રાખવામાં આવી રહી છે. ટૂંકા શૂટિંગ છતાં અક્ષય કુમારનો આ વિલન અવતાર થિયેટરોમાં કેવો ધમાકો કરે છે અને દર્શકોને કેટલો પસંદ આવે છે તે જોવું ખરેખર ખૂબ જ રસપ્રદ રહેશે.
