બોલિવૂડના સ્ટાર કોમેડિયન રાજપાલ યાદવ ચેક બાઉન્સના કેસમાં ફસાયા છે. 9 કરોડ રૂપિયાના કર્જનો આ મામલો છે જેને ચૂકવવામાં તેઓ અસમર્થ રહ્યા હતા. 5 ફેબ્રુઆરીએ તેમણે સરેન્ડર કર્યું અને ત્યારથી તિહાડ જેલમાં બંધ છે. 17 ફેબ્રુઆરીએ તેમની ભત્રીજીના લગ્ન છે તેથી તેમણે જામીનની માંગ કરી. સુનાવણી દરમિયાન અદાલતે તેમને કડક શબ્દોમાં ઠપકો આપ્યો.
દિલ્હી હાઈકોર્ટએ પૂછ્યું કે જ્યારે તમે સ્વીકારી લીધું છે કે તમે પૈસા ઉધાર લીધા હતા અને ચૂકવશો એવું કહ્યું હતું તો હવે સજા રદ્દ કરવાની માંગ કેમ કરો છો. તમે ગુનો કબૂલ કર્યો અને સજા થયા પછી હવે સજા અટકાવવાની વાત કરો છો.રાજપાલના વકીલે કહ્યું કે અમે અગાઉની તારીખે જ જણાવ્યું હતું કે અમે મામલો સમાધાન કરવા માંગીએ છીએ. રાજપાલે પોતાના શબ્દનો માન રાખવા માટે જ સરેન્ડર કર્યું છે. ફિલ્મમાં લગાવેલી 5 કરોડની રકમ ચૂકવવાની તેમની ઈચ્છા છે અને 3 કરોડથી વધુ રકમ તેઓ પહેલેથી ચૂકવી ચૂક્યા છે.
અદાલતે કહ્યું કે તમે વર્ષો સુધી પૈસા ચૂકવ્યા નથી અને આદેશની અવગણના કરી છે એટલે તમને સરેન્ડર કરવું પડ્યું. તમને 25 થી 30 તક આપવામાં આવી હતી. સહાનુભૂતિ હોઈ શકે પણ કાયદો કાયદો છે. વકીલે કહ્યું કે હજુ 2 કરોડ 10 લાખ રૂપિયા જમા કરવા બાકી છે અને બોલિવૂડમાંથી મદદ મળી રહી છે. અદાલતે કહ્યું કે તેનાથી કેસનો કોઈ સંબંધ નથી.
જો તમે રકમ જમા કરવા તૈયાર હો તો સુનાવણી આગળ વધારશું. પરિવારના લગ્નને કારણે તેમને તાત્કાલિક જામીન જોઈએ છે. હવે આગલી સુનાવણી સોમવારે થશે.આ કેસ 2010નો છે જ્યારે રાજપાલ યાદવે અતા પતા લાપતા નામની ફિલ્મ બનાવી હતી. ફિલ્મનો ખર્ચ લગભગ 11 કરોડ હતો જેમાંથી 5 કરોડ રૂપિયા લેવામાં આવ્યા હતા. કંપનીનું કહેવું છે કે આ લોન હતી અને વ્યાજ સાથે પરત કરવી હતી જ્યારે રાજપાલનું કહેવું છે કે આ રોકાણ હતું. ફિલ્મ 2012માં રિલીઝ થઈ
પરંતુ માત્ર 47 લાખ જેટલી કમાણી કરી શકી. બાદમાં કર્જ ચૂકવવા માટે આપેલા ચેક બાઉન્સ થઈ ગયા અને કંપનીએ કેસ કર્યો. 2018માં અદાલતે તેમને દોષિત ઠરાવી 6 મહિનાની સજા સંભળાવી. હાઈકોર્ટએ સજા સ્થગિત રાખી અને રકમ ચૂકવવા સમય આપ્યો પરંતુ ચૂકવણી ન થતાં તેમને સરેન્ડર કરવાનો આદેશ આપવામાં આવ્યો.રાજપાલ યાદવની મદદ માટે બોલિવૂડના ઘણા લોકો આગળ આવ્યા છે. સોનુ સૂદે તેમને પોતાની આગામી ફિલ્મમાં રોલ આપવાની અને ફી એડવાન્સમાં આપવાની વાત કરી છે. મિકા સિંહે 11 લાખ રૂપિયાની મદદ જાહેર કરી અને અન્ય લોકોને પણ સહાય માટે અપીલ કરી છે. અનુપ જલોટાએ પણ આર્થિક મદદ કરવાની વાત કરી છે.
સલમાન ખાને તેમની ટીમ સાથે સંપર્ક કર્યો હોવાનું કહેવાય છે. તેજ પ્રતાપે 22 લાખ રૂપિયાની મદદ આપવાનો દાવો કર્યો છે. અનુજ ચૌધરીએ પોતાના પગાર ખાતામાંથી 51 હજાર રૂપિયા સહાયરૂપે આપવાની જાહેરાત કરી છે. હાલ રાજપાલ યાદવની જામીન અરજી પર સુનાવણી ચાલી રહી છે અને કોર્ટના નિર્ણય પર સૌની નજર છે.
