જૂન મહિનો શરૂ થઈ ગયો છે અને આ નવા મહિનાની પહેલી તારીખ સાથે દેશમાં અનેક મોટા ફેરફારો અમલમાં આવી ગયા છે. 1 જૂન 2026થી બદલાયેલા નિયમો સીધી અસર તમારા ઘરખર્ચ અને તમારા ખિસ્સા પર પાડવાના છે. રસોડાના સંચાલનથી લઈને મોબાઇલ દ્વારા થતા ડિજિટલ UPI પેમેન્ટ, બેન્કિંગ ચાર્જિસ, ટેક્સ રાહતો અને નવી કારોની કિંમતો સુધી ઘણી બાબતોમાં ફેરફાર થયો છે. ચાલો આ તમામ મહત્વપૂર્ણ ફેરફારોને સરળ ભાષામાં સમજીએ.
સૌથી મોટો અને મહત્વપૂર્ણ ફેરફાર તમારા રસોડા સાથે જોડાયેલો છે. પેટ્રોલિયમ અને પ્રાકૃતિક ગેસ મંત્રાલયે એવા લોકો માટે નિયમો વધુ કડક બનાવ્યા છે જેમની પાસે ઘરમાં LPG સિલિન્ડર અને PNG એટલે કે પાઇપ્ડ નેચરલ ગેસ બંનેના કનેક્શન છે. નવા નિયમ અનુસાર જો તમારા ઘરમાં PNG કનેક્શન સક્રિય છે, તો 1 જૂનથી તમને 30 દિવસનો સમય આપવામાં આવશે. આ સમયમર્યાદા દરમિયાન તમારે તમારું જૂનું LPG સિલિન્ડર કનેક્શન સરેન્ડર કરવું પડશે.
હવે વાત કરીએ તમારી ડિજિટલ સુરક્ષાની. Google Pay, PhonePe અને Paytm જેવી ડિજિટલ એપ્સ દ્વારા ટ્રાન્ઝેક્શન કરતા લોકો માટે NPCI એટલે કે નેશનલ પેમેન્ટ્સ કોર્પોરેશન ઓફ ઇન્ડિયાએ મહત્વપૂર્ણ પગલું ભર્યું છે. ઓનલાઇન છેતરપિંડી અને ભૂલથી ખોટા ખાતામાં પૈસા ટ્રાન્સફર થવાની સમસ્યાને રોકવા માટે હવે જ્યારે પણ તમે કોઈને પૈસા મોકલશો ત્યારે UPI PIN દાખલ કરતા પહેલાં સ્ક્રીન પર તે વ્યક્તિનું બેન્ક ખાતામાં નોંધાયેલું અસલી કાનૂની નામ દેખાશે.
આગળનો ફેરફાર બેન્કિંગ અને ATM ટ્રાન્ઝેક્શન સાથે સંબંધિત છે. ઘણી મોટી બેન્કોએ દર મહિને મળતા ત્રણથી પાંચ મફત ATM ટ્રાન્ઝેક્શનના નિયમોને વધુ કડક બનાવ્યા છે. હવે મફત મર્યાદા પૂરી થયા પછી રોકડ ઉપાડવા, મિની સ્ટેટમેન્ટ જોવા અથવા બેલેન્સ ચેક કરવા માટે પહેલાં કરતાં વધુ ચાર્જ ચૂકવવો પડી શકે છે.
જૂન મહિનો કરદાતાઓ માટે પણ ખૂબ મહત્વનો છે. એડવાન્સ ટેક્સ ચૂકવનારાઓએ 15 જૂન સુધી તેમની કુલ કર જવાબદારીના 15 ટકા ભાગની ચુકવણી કરવી ફરજિયાત છે. જો આવું નહીં કરવામાં આવે તો દર મહિને 1 ટકા દંડ વ્યાજ લાગી શકે છે.
જોકે નોકરીયાત લોકો માટે એક સારા સમાચાર પણ છે. બેંગલુરુ, પુણે, હૈદરાબાદ અને અમદાવાદ જેવા મોટા કોર્પોરેટ હબમાં હવે 50 ટકા HRA ટેક્સ છૂટના દાયરામાં આવશે, જેના કારણે ઘણા કર્મચારીઓને કરમાં રાહત મળી શકે છે.
આ ઉપરાંત સરકારે પેટ્રોલ, ડીઝલ અને ATF એટલે કે જેટ ફ્યુઅલના નિકાસ પર લાગતા કેટલાક શુલ્કમાં ઘટાડો કર્યો છે. તેના પરિણામે પેટ્રોલના ભાવમાં આશરે ₹1.50, ડીઝલમાં ₹3 અને જેટ ફ્યુઅલમાં પણ ઘટાડો જોવા મળી શકે છે.
બીજી તરફ જૂન મહિનાથી સોલાર પેનલની કિંમતો વધી શકે છે. કારણ કે સરકારની નવી Approved Models and Manufacturers List અમલમાં આવી રહી છે. આ નિયમ મુજબ હવે સરકારી પ્રોજેક્ટ્સ અને સબસિડીવાળા કાર્યોમાં માત્ર મંજૂર યાદીમાં સમાવિષ્ટ સોલાર પેનલોનો જ ઉપયોગ કરી શકાશે.
એટલે કે 1 જૂનથી માત્ર કેલેન્ડરની તારીખ જ બદલાઈ નથી, પરંતુ તમારા દૈનિક જીવન અને ઘરખર્ચ સાથે જોડાયેલા અનેક મહત્વપૂર્ણ નિયમોમાં પણ ફેરફાર થયો છે. તેથી આ તમામ બદલાવોને ધ્યાનમાં રાખીને તમારા નવા મહિનાનું બજેટ અને ખર્ચનું આયોજન કરવું વધુ યોગ્ય રહેશે.
.
