સલમાન ખાન દેશદ્રોહી છે. તેને ભારત કરતાં પાકિસ્તાન વધારે પ્રિય છે. પાકિસ્તાન જતું રહે. આ પ્રકારનું નિવેદન ઉત્તર પ્રદેશના મંત્રી રઘુરાજ સિંહે આપ્યું હતું. જોકે હવે રઘુરાજ સિંહે બોલીવૂડના સુપરસ્ટાર સલમાન ખાન પાસે માફી માગી છે. આખરે તેમણે સલમાન ખાન પાસે માફી કેમ માગી, ચાલો આખો મામલો જાણીએ.બે દિવસ પહેલા રઘુરાજ સિંહે એક નિવેદન આપ્યું હતું જેમાં તેમણે કહ્યું હતું કે સલમાન ખાનને પાકિસ્તાનથી ખૂબ પ્રેમ છે.
સલમાન ખાને ભારત છોડીને પાકિસ્તાનમાં જ સેટલ થઈ જવું જોઈએ. તેમને ભારતીયોના દુખ દેખાતા નથી, પરંતુ પાકિસ્તાન મુશ્કેલીમાં હોય ત્યારે તેઓ ભારે દાન આપે છે. ભારતમાં તેમણે ક્યારેય આવા કામ કર્યા નથી. એમએલએ રઘુરાજ સિંહે આ પણ કહ્યું હતું કે સલમાન ખાનની ફિલ્મોનો બહિષ્કાર કરવો જોઈએ અને હવે લોકોએ તેમની ફિલ્મો જોવી નહીં જોઈએ.
તેમણે સલમાન ખાનને દેશદ્રોહી કહીને પાકિસ્તાન જવાની સલાહ આપી હતી.રઘુરાજ સિંહનું આ નિવેદન સોશિયલ મીડિયા પર વાયરલ થયું હતું અને સલમાન ખાનના ફેન્સે તેમની ભારે નિંદા કરી હતી. પરંતુ આ દરમિયાન રઘુરાજ સિંહનો એક બીજો વીડિયો સામે આવ્યો છે, જેમાં તેઓ સલમાન ખાન પાસે માફી માગતા જોવા મળે છે.
તેઓ કહે છે કે તેમના જે નિવેદનો હતા તે સલમાન ખાન માટે નહોતા, પરંતુ બોલીવૂડના બીજા એક સુપરસ્ટાર માટે હતા. જ્યારે તેમને પૂછવામાં આવ્યું કે તે કયા સુપરસ્ટાર માટે હતા, ત્યારે તેમણે કહ્યું કે આ બધી વાતો તેઓ શાહરુખ ખાન માટે કહેવા માગતા હતા, પરંતુ ભૂલથી સલમાન ખાનનું નામ લઈ લીધું.
રઘુરાજ સિંહે જણાવ્યું કે શાહરુખ ખાનને પાકિસ્તાનીઓની ઘણી ચિંતા રહે છે. જ્યારે પણ પાકિસ્તાનમાં કોઈ મુશ્કેલી આવે છે ત્યારે શાહરુખ ખાન લગભગ 265 કરોડ રૂપિયાનું દાન આપે છે. પરંતુ બીજી તરફ બાંગ્લાદેશમાં હિંદુઓ સાથે જ્યારે અન્યાય થાય છે ત્યારે શાહરુખ ખાન મૌન રહે છે. આ બધી વાતો તેઓ શાહરુખ ખાન માટે કહેવા માગતા હતા, પરંતુ સલમાન ખાનનું નામ ભૂલથી નીકળી ગયું.
ઉલ્લેખનીય છે કે છેલ્લા કેટલાક સમયથી શાહરુખ ખાનની ટીકા થઈ રહી હતી કારણ કે તેમની આઈપીએલ ટીમ કેકેઆરમાં એક બાંગ્લાદેશી ક્રિકેટરને લેવામાં આવ્યો હતો. બાંગ્લાદેશમાં હિંદુઓ પર થતા હુમલાઓની ખબર સામે આવ્યા બાદ ઘણા લોકો શાહરુખ ખાનના વિરોધમાં આવી ગયા હતા અને માગ કરી હતી કે આ ક્રિકેટરને ટીમમાંથી બહાર કરવામાં આવે. અંતે બીસીસીઆઈને વચ્ચે આવવું પડ્યું હતું અને શાહરુખ ખાનની ટીમને તે ક્રિકેટરને ટીમમાંથી દૂર કરવાની સૂચના આપવામાં આવી હતી.
