નાના પાટેકરનું અસલી નામ શું હતું? લોકો ‘નાના’ કેમ કહેતા હતા?

તમને ખબર છે નાના પાટેકરનું અસલી નામ શું હતું? લોકો તેમને ‘નાના’ કહીને કેમ બોલાવતા હતા? ચાલો જાણીએ.ભારતીય સિનેમા જગતમાં આજે ગુરુવારે શોક છવાઈ ગયો છે. કારણ કે બોલિવૂડના દિગ્ગજ અભિનેતા નાના પાટેકર (Nana Patekar)નું આજે સવારે 75 વર્ષની ઉંમરે નિધન થયું છે. ગોવા ખાતે આવેલા તેમના ઘરે તેમને કાર્ડિયક અરેસ્ટ (Cardiac Arrest) આવ્યો હતો. જે બાદ તેને વહેલી સવારે હોસ્પિટલ લઈ જવામાં આવ્યા હતા, જ્યાં ડોક્ટરે તેમને મૃત જાહેર કર્યા હતા. નાના પાટેકરના નિધનના સમાચારથી તેમના પરિવારની સાથે-સાથે તેમના ચાહકો અને ફિલ્મ ઇન્ડસ્ટ્રીમાં શોકનું મોજુ ફરી વળ્યું છે.

દાયકાઓ સુધી પોતાના દમદાર અભિનય, કડક અવાજ અને અલગ અંદાજથી દર્શકોના દિલો પર રાજ કરનાર નાના પાટેકરે અનેક યાદગાર પાત્રો ભજવ્યા છે. પરંતુ તેમના નિધન બાદ તેમના નામ સાથે જોડાયેલો એક રસપ્રદ કિસ્સો પણ ચર્ચામાં છે. ખરેખર ઘણા લોકોને ખબર નહીં હોય કે તેમનું અસલી નામ નાના પાટેકર નહોતું.

નાના પાટેકરનું અસલી નામ શું હતું? – ફિલ્મી દુનિયામાં જે અભિનેતાને બધા નાના પાટેકરના નામથી ઓળખતા હતા, તેમનું અસલી નામ વિશ્વનાથ પાટેકર (Vishwanath Patekar) હતું. તેમના ઘણા જૂના પરિચિતો તેમને પ્રેમથી વિશુ નામથી પણ ઓળખતા હતા. ખુદ નાના પાટેકરે એક ઇન્ટરવ્યૂમાં પોતાના નામ સાથે જોડાયેલી આ વાત શેર કરી હતી.

તેમણે કહ્યું હતું કે, બાળપણમાં તેમની માતાની ખાસ બહેનપણી, જે તેમના માટે માસી જેવી હતી, તે તેમને પ્રેમથી ‘નાના-નાના’ કહીને બોલાવતી હતી. ધીમે-ધીમે કુટુંબ અને આસપાસના લોકો પણ તેમને આ જ નામથી બોલાવવા લાગ્યા. આગળ જતાં નાના નામથી તેમને મોટી ઓળખ મળી ગઈ.

નાના પાટેકરે કહ્યું હતું કે, જ્યારે કોઈ તેમને વિશ્વનાથ કે વિશુ કહીને બોલાવતું ત્યારે તેમને તરત અંદાજ આવી જતો કે સામેનો વ્યક્તિ તેમની સાથે શાળામાં અભ્યાસ કરતો કોઈ વિદ્યાર્થી અથવા બાળપણનો કોઈ મિત્ર છે. બાકીની દુનિયા માટે તેઓ નાના જ હતા. સમય જતાં નાના નામ એટલું લોકપ્રિય થઈ ગયું કે અભિનેતાએ પોતે પણ તેને પોતાની સત્તાવાર ઓળખ બનાવી લીધી. તેમણે કહ્યું હતું કે તેમના પાસપોર્ટ અને અન્ય ડોક્યુમેન્ટમાં પણ નાના પાટેકર નામ નોંધાયેલું છે.

નાના પાટેકરનો જન્મ 1 જાન્યુઆરી 1951ના રોજ થયો હતો. તેમણે પોતાની અભિનય યાત્રાની શરૂઆત થિયેટરથી કરી અને 1978માં ફિલ્મ ગમન દ્વારા સિનેમામાં એન્ટ્રી કરી. ત્યારબાદ તેમણે અંગાર, તિરંગા, ક્રાંતિવીર અને રાજનીતિ જેવી ફિલ્મોમાં પોતાના અભિનયથી બધાના દિલ જીતી લીધા. 2007માં આવેલી ફિલ્મ વેલકમમાં તેમના ઉદય શેટ્ટીના પાત્રએ લોકોને ખૂબ હસાવ્યા હતા. નાના પાટેકરને તેમના અભિનય માટે ત્રણ રાષ્ટ્રીય ફિલ્મ પુરસ્કાર સહિત અનેક પ્રતિષ્ઠિત સન્માન મળ્યા હતા. વર્ષ 2013માં તેમને પદ્મશ્રીથી પણ સન્માનિત કરવામાં આવ્યા હતા.