૧૯૯૧માં આવેલી સંજય દત્ત અને પૂજા ભટ્ટ સ્ટારર ફિલ્મ ‘સડક’ ખૂબ પસંદ કરવામાં આવી હતી. આ ફિલ્મના ગીતો પણ શાનદાર હતા અને સદાશિવ અમરાપુરકરની ભૂમિકાના પણ ખૂબ વખાણ થયા હતા. પરંતુ આ એ જ ફિલ્મ છે જ્યારે સંજય દત્ત એક સીન કરતા ગભરાઈ રહ્યા હતા
અને પછી મહેશ ભટ્ટે સંજય દત્તને એવી વાત કહી કે તેમણે તે સીન કર્યો. હવે સવાલ એ ઉઠે છે કે સંજય દત્ત જે ૧૯૯૧ સુધી ફિલ્મ ઈન્ડસ્ટ્રીમાં ઘણી ફિલ્મો કરી ચૂક્યા હતા અને એક નિષ્ણાત અભિનેતા હતા, કેમેરા સામે જરાય શરમાતા નહોતા, તો પછી ‘સડક’ દરમિયાન મહેશ ભટ્ટે તેમને એવો કયો સીન આપ્યો જે કરવાથી તેઓ ગભરાતા હતા અને ના પાડી દીધી હતી? હકીકતમાં આ સીન પૂજા ભટ્ટને કિસ કરવાનો હતો. ફિલ્મોમાં હિરોઈનને કિસ કરવી એ સામાન્ય વાત છે
અને સંજય દત્તે અગાઉ પણ ઘણી ફિલ્મોમાં કિસિંગ સીન્સ આપ્યા હતા, તો પૂજા ભટ્ટ સાથે તેમને શું વાંધો હતો? તેનું કારણ એ હતું કે સંજય દત્ત પૂજા ભટ્ટને પોતાની નાની બહેન જેવી માનતા હતા. બંને વચ્ચે ૨૩ વર્ષનો તફાવત હતો અને સંજય દત્તે પૂજાને બાળપણથી મોટી થતા જોઈ હતી. જે છોકરીને તેઓ અંગત જીવનમાં બહેન માનતા હોય તેને કેમેરા સામે કિસ કેવી રીતે કરે? સંજય દત્તે મહેશ ભટ્ટને આ સીન કરવાની મનાઈ કરી દીધી.
બીજી તરફ મહેશ ભટ્ટ ફિલ્મની લાગણીઓ વ્યક્ત કરવા માટે જરૂરી સીન્સ રાખવા મક્કમ હતા. તેમણે નક્કી કર્યું હતું કે આ સીન તો થશે જ. સંજય દત્તને મનાવવા માટે મહેશ ભટ્ટે એક અલગ જ તર્ક આપ્યો. શરૂઆતમાં તેઓ થોડા ગુસ્સે થયા અને સંજય દત્તને સૌથી મોટા ‘હિપોક્રેટ’ કહી દીધા. તેમણે કહ્યું કે જો તમે આ ફિલ્મમાં પૂજા ભટ્ટને કિસ નથી કરી શકતા, તો તમને જીવનમાં કોઈ બીજાની દીકરીને કિસ કરવાનો પણ હક નથી. ત્યારબાદ તેમણે સમજાવ્યું કે કેમેરા સામે તમારે અંગત જીવનની લાગણીઓ છોડવી પડે છે. ફિલ્મમાં પૂજા તમારી બહેન નથી પણ તમારો ‘લવ ઇન્ટરેસ્ટ’ છે અને
પ્રેમ વ્યક્ત કરવા આ સીન જરૂરી છે. પૂજા ભટ્ટ પણ સંજય દત્ત સાથે કિસિંગ સીન કરવામાં કમ્ફર્ટેબલ નહોતી. ત્યારે મહેશ ભટ્ટે તેને સમજાવ્યું કે ઈન્ટિમેટ સીન્સ દરમિયાન અંગત લાગણીઓ દૂર રાખવી જોઈએ અને સીનને ખૂબ જ ગ્રેસફુલી (સભ્યતાથી) કરવો જોઈએ જેથી તેની ગરિમા જળવાય. મહેશ ભટ્ટે બંને કલાકારોને ટ્રેનિંગ આપી અને અંતે તે સીન શૂટ થયો. ફિલ્મમાં તે સીન જરાય અજુગતો ન લાગ્યો અને વાર્તા સાથે ભળી ગયો. મહેશ ભટ્ટ માત્ર સારા ફિલ્મ મેકર જ નહીં પણ સારા ટ્રેનર પણ હતા. મહેશ ભટ્ટ હવે ફિલ્મો કેમ નથી બનાવતા તેવા પ્રશ્ન પર તેમણે એક ઈન્ટરવ્યુમાં કહ્યું હતું કે, આજની દુનિયા મુજબ હું ‘આઉટડેટેડ’ છું અને હું એવા લાલચુ દિગ્દર્શકોમાંનો નથી જે પોતાના પગના નિશાન છોડી જવા માંગતા હોય. મેં જે કામ કર્યું અને ઇન્ડસ્ટ્રીને જે આપ્યું તેનાથી હું ખુશ છું.
