વિડિયો જોઈને મને એવું લાગી રહ્યું હતું કે હું જ એને બે કાન નીચે ચાંટો મારી દઉં. બિહારના મુખ્યમંત્રી નીતિશ કુમારે તમામ હદો પાર કરી દીધી છે. એક મુસ્લિમ મહિલા ડોક્ટરનો નકાબ ખેંચવાનો મામલો હવે ભારે વિવાદમાં ફેરવાઈ ગયો છે. ચારેય તરફથી મુખ્યમંત્રી પર આક્ષેપો થઈ રહ્યા છે. હિજાબ વિવાદ પર સના ખાનનો ગુસ્સો ફૂટ્યો છે. બિહારના મુખ્યમંત્રીની તેમણે ખુલ્લેઆમ ટીકા કરી છે. સાથે જ રાખી સાવંતે પણ રાજકારણીને જોરદાર ફટકાર લગાવી છે. કેમેરા સામે એવી વાત કહી દીધી છે કે સાંભળીને સૌ કોઈ ચોંકી ગયા છે.
બિહારના મુખ્યમંત્રી નીતિશ કુમાર સાથે જોડાયેલો હિજાબનો મામલો હવે વધુ તૂલ પકડી રહ્યો છે. નીતિશ કુમારે તાજેતરમાં એક સમારંભ દરમિયાન એવી હરકત કરી હતી કે જેને જોઈ લોકો ગુસ્સેમાં આવી ગયા. એક કાર્યક્રમમાં મુસ્લિમ મહિલા ડોક્ટરનો હિજાબ ખેંચવાનો વિડિયો સોશિયલ મીડિયા પર વાયરલ થતાં જ ફિલ્મી હસ્તીઓએ પણ મુખ્યમંત્રીની કડક ટીકા કરી છે. આ ઘટના રાજકીય ગલિયારાઓમાંથી નીકળીને હવે બોલિવૂડ સુધી પહોંચી ગઈ છે. જાયરા વસીમ બાદ હવે એક્ટ્રેસ સના ખાન અને રાખી સાવંતે પણ આ મુદ્દે પોતાનો રોષ વ્યક્ત કર્યો છે.
આ ઘટના દરમિયાન મુસ્લિમ મહિલા ડોક્ટર નુસરત પરવીન સર્ટિફિકેટ લેવા મંચ પર આવી હતી. તેમણે હિજાબ અને નકાબ પહેર્યો હતો. વાયરલ વીડિયોમાં જોઈ શકાય છે કે મુખ્યમંત્રી નીતિશ કુમારે અચાનક નુસરત પરવીનનો નકાબ ખેંચી લીધો, જેના કારણે તે ખૂબ અનકમ્ફર્ટેબલ થઈ ગઈ હતી. આ દરમિયાન મંચ પર હાજર લોકો ચૂપચાપ ઊભા રહ્યા. આ ઘટનાએ મહિલાઓની સુરક્ષા અને ધાર્મિક માન્યતાઓને લઈને પણ અનેક સવાલો ઊભા કર્યા છે.
સના ખાને આ ઘટનાને લઈને સોશિયલ મીડિયા પર પોતાનો ગુસ્સો વ્યક્ત કર્યો છે. તેમણે પોતાની ઇન્સ્ટાગ્રામ સ્ટોરીમાં એક વિડિયો શેર કરી કહ્યું કે આ એક ખૂબ જ ગંભીર મુદ્દો છે, જેના પર વાત કરવી જરૂરી છે. તેમણે કહ્યું કે એક હિજાબ પહેરનારી બહેનને સન્માનિત કરતી વખતે એક રાજકારણીએ તેનું નકાબ ખેંચી લેવું અત્યંત અપમાનજનક છે. વિડિયો જોઈને તેમને અંદરથી ભારે ગુસ્સો આવ્યો અને એવું લાગ્યું કે ત્યાં હાજર લોકોએ પણ હસી ને આ વર્તનને સમર્થન આપ્યું. તેમણે સવાલ ઉઠાવ્યો કે જ્યારે સ્ટેજ પર, કેમેરા સામે બેઠેલો વ્યક્તિ આવી હરકત કરે છે તો સામાન્ય મહિલાઓ કેટલી સુરક્ષિત છે.
સના ખાને મહિલાઓની સુરક્ષા પર પણ ગંભીર પ્રશ્નો કર્યા છે અને કહ્યું છે કે આપણે પછીથી પ્રોટેસ્ટ કરીએ છીએ, કેન્ડલ માર્ચ કાઢીએ છીએ, પરંતુ જ્યારે સત્તામાં બેઠેલા લોકો જ આવી હરકત કરે ત્યારે શું કરવું?
સના ખાન પછી બોલિવૂડની ડ્રામા ક્વીન રાખી સાવંતે પણ આ મુદ્દે પોતાનો ગુસ્સો વ્યક્ત કર્યો છે. રાખીએ એક વિડિયો શેર કરીને મુખ્યમંત્રીની ગરિમા પર સવાલ ઉઠાવ્યા છે. શરૂઆતમાં તેમણે નીતિશ કુમાર પ્રત્યે પોતાનો સન્માન વ્યક્ત કર્યો, પરંતુ બાદમાં તેમણે કહ્યું કે એક મુસ્લિમ મહિલાના નકાબને હાથ લગાવવો ધર્મ અને સંસ્કૃતિ બંનેનો અપમાન છે. તેમણે કહ્યું કે કુરાનમાં લખેલું છે કે મહિલાના નકાબ અને અબાયા સાથે કોઈ છેડછાડ કરી શકતું નથી. રાખીએ નીતિશ કુમારને ખુલ્લેઆમ માફી માંગવા કહ્યું છે અને જણાવ્યું છે કે જાહેરમાં તે મહિલા પાસે બહેન કહીને માફી માંગવી જોઈએ.
રાખી સાવંતના આ વિડિયો વાયરલ થયા બાદ તેમને મિશ્ર પ્રતિભાવ મળ્યા છે. કેટલાક લોકો તેમના સ્પષ્ટ વક્તવ્યની પ્રશંસા કરી રહ્યા છે તો કેટલાક લોકો તેમને એક ભૂલ માટે ટ્રોલ કરી રહ્યા છે. વિડિયોમાં રાખીએ નીતિશ કુમારને બિહારના બદલે યુપીના મુખ્યમંત્રી કહી દીધા હતા, જેના કારણે તેમને ટ્રોલિંગનો સામનો કરવો પડ્યો.
બ્યુરો રિપોર્ટ E2
