રોહિત શેટ્ટીના ઘરે થયેલી ફાયરિંગ અંગે હવે કેટલીક વધુ ચોંકાવનારી વિગતો સામે આવી છે. જાણવા મળ્યું છે કે આ ફાયરિંગની તૈયારી ઘણાં દિવસોથી ચાલી રહી હતી. શૂટરે ઘટનાના લગભગ દસ દિવસ પહેલાંથી જ રોહિત શેટ્ટીના ઘરની રેકી શરૂ કરી દીધી હતી.
તેણે બિલ્ડિંગના બધા રસ્તા, આસપાસનું વાતાવરણ અને સિક્યુરિટીની આવનજાવન પર સતત નજર રાખી હતી. આ બધું ધ્યાનમાં લઈને તેણે ફાયરિંગ ક્યારે કરવી અને ત્યારબાદ કેવી રીતે ભાગવું તેનો સંપૂર્ણ પ્લાન બનાવ્યો હતો.માહિતી અનુસાર શૂટર્સે લેટ નાઈટનો સમય ખાસ આ માટે પસંદ કર્યો હતો જેથી ટ્રાફિક ન હોય અને ફાયરિંગ પછી સરળતાથી ફરાર થઈ શકાય. 1 ફેબ્રુઆરીની રાતે રોહિત શેટ્ટી લગભગ રાત્રે 10 વાગ્યે ઘરે પરત આવ્યા હતા. ત્યારબાદ તેમણે ડિનર કર્યું અને સાતમા માળે પોતાના પરિવાર સાથે આરામ કરવા ગયા હતા.
રાત્રે લગભગ 12:30 થી 1 વાગ્યાની વચ્ચે તેમના ઘરની તરફ પાંચ રાઉન્ડ ફાયરિંગ કરવામાં આવી. જેમાંથી કેટલીક ગોળીઓ તેમની બાલ્કનીના કાચ પર વાગી અને કાચ તૂટી ગયો.શરૂઆતમાં સિક્યુરિટી સ્ટાફને લાગ્યું કે કદાચ ફટાકડા ફૂટ્યા છે. પરંતુ જ્યારે તેમણે જોયું કે ગોળીઓ વાગી છે અને કાચ તૂટી ગયો છે, ત્યારે તરત જ પોલીસને જાણ કરવામાં આવી. પોલીસે પણ તાત્કાલિક નાકાબંધી કરી હતી, છતાં પણ શૂટર ભાગવામાં સફળ રહ્યો.
કારણ કે તેને ભગાડવા માટે આખી ટીમે પહેલેથી જ પૂરી તૈયારી રાખી હતી.જૂહૂ વિસ્તારમાં એક જગ્યાએ સ્કૂટી પહેલેથી જ તૈયાર રાખવામાં આવી હતી. શૂટરે પહેલા રોહિત શેટ્ટીની બિલ્ડિંગ પર ફાયરિંગ કરી અને ત્યારબાદ સ્કૂટી લઈને ભાગ્યો. પરંતુ હોટેલ ટ્યુલિપ સ્ટાર પાસેના સિગ્નલ પર પોલીસની નાકાબંધી જોઈને તેણે સ્કૂટી જુહૂ ચર્ચ રોડ તરફ વાળી.
ત્યારબાદ ત્યાં સ્કૂટી છોડીને રિક્ષા લઈને ફરાર થઈ ગયો. પોલીસને ત્યાંથી સ્કૂટી મળી આવી.જ્યારે સ્કૂટીની વિગતો કાઢવામાં આવી ત્યારે જાણવા મળ્યું કે તેનો મૂળ માલિકે પંદર દિવસ પહેલાં આ સ્કૂટી આરોપી આદિત્ય ગાયકી નામના વ્યક્તિને વેચી હતી. આદિત્ય ગાયકી આ બધું શુભમ લોનકરના કહેવા મુજબ કરી રહ્યો હતો. આદિત્ય અને તેના સાથીઓએ મળીને સ્કૂટી, પૈસા અને ફાયરિંગ માટે જરૂરી હથિયારની વ્યવસ્થા કરી હતી.શરૂઆતમાં પ્લાન એવો હતો કે સ્કૂટી લોનાવલા સુધી લાવવામાં આવશે
અને મુંબઈનો શૂટર ત્યાંથી સ્કૂટી લઈને મુંબઈ પરત ફરશે. પરંતુ શૂટર લોનાવલા જઈ શક્યો નહોતો, ત્યારબાદ પુણેના આરોપીઓએ સ્કૂટી મુંબઈની એક નિશ્ચિત જગ્યાએ મોકલી દીધી અને માહિતી આપી દીધી કે સ્કૂટી ત્યાં ઉભી રહેશે.પોલીસે આદિત્ય ગાયકી, સિદ્ધાર્થ, દીપક, સમર્થ પોમજી અને સ્વપ્નિલ બાંધુને ધરપકડ કરી લીધી છે. પરંતુ હજુ સુધી રોહિત શેટ્ટીની બિલ્ડિંગ પર ફાયરિંગ કરનાર મુખ્ય શૂટર પોલીસના હાથમાં આવ્યો નથી. આ ઉપરાંત શુભમ લોનકર, જેણે આ તમામને આ ટાસ્ક આપ્યો હતો અને જે લોરેન્સ બિશ્નોઈ ગેંગનો સભ્ય છે તથા બાબા સિદ્દીકીના મર્ડર પ્લાન સાથે જોડાયેલો હતો, તે પણ હાલ ફરાર છે.
