ઈરાન પર હુમલાને લઈને અમેરિકા અને ઈઝરાયેલની રણનીતિ જે પણ રહી હોય, પરંતુ ઈરાનની જનતા વિશેના તેમના તમામ ગણિત નિષ્ફળ ગયા છે. આ વિડીયો જુઓ, જે ઈરાની મીડિયા પ્રેસ ટીવી દ્વારા જાહેર કરવામાં આવ્યો છે. જેમાં એક ખૂબ જ વૃદ્ધ મહિલા હાથમાં ઈરાનનો ઝંડો લઈને લાકડીના ટેકે ધીમે ધીમે ચાલી રહ્યા છે. તેમણે ઈરાનનો રાષ્ટ્રીય પોશાક પહેર્યો છે અને કમર નમેલી છે, પરંતુ તેહરાનની સડકો પર બાકીના લોકોની સાથે ઇસ્લામિક રિવોલ્યુશનના સમર્થનમાં તેઓ પણ ઉતરી આવ્યા છે. જોતા લાગે છે કે આ વૃદ્ધ મહિલાની ઉંમર ઘણી હશે, પરંતુ તેમની ઉંમર પર તેમનો જુસ્સો હાવી થઈ રહ્યો છે. આ એ જ જુસ્સો છે જેણે ઈરાનને છેલ્લા ૧૭ દિવસથી ટકાવી રાખ્યું છે. કોઈ પણ દેશ ભલે ગમે તેટલી મજબૂત સૈન્ય તાકાત ધરાવતો હોય, પરંતુ જ્યાં સુધી જનતાનો સાથ તેને ન મળે ત્યાં સુધી જંગ લડવો અને તેને આગળ વધારવો અત્યંત મુશ્કેલ બની જાય છે.
જાન્યુઆરી ૨૦૨૬માં જ્યારે ઈરાનમાં ‘ઝેન-ઝી’ એટલે કે યુવાનો મોંઘવારીને લઈને પોતાની સરકાર વિરુદ્ધ રસ્તા પર ઉતર્યા હતા, ત્યારે અમેરિકા અને ઈઝરાયેલે તેને એક તક માની લીધી હતી. તેમને લાગ્યું હતું કે આવો જ ગુસ્સો જનતા હુમલા પછી ઇસ્લામિક રિવોલ્યુશન પ્રત્યે પણ બતાવશે. ઈમામ આયાતુલ્લા અલી ખામેનીના નિધનથી જનતા પૂરી રીતે શાસન વિરુદ્ધ થઈ જશે, પરંતુ અહીં અમેરિકા થાપ ખાઈ ગયું. જ્યારે આ વૃદ્ધ માજી ઈરાનના લાખો લોકોની દરરોજ નીકળતી રેલીઓ સાથે ઝંડો લઈને રસ્તા પર નીકળે છે, ત્યારે ખબર પડે છે કે ૩,૦૦૦ વર્ષ જૂની સભ્યતાને ક્યારેય કેમ જીતી શકાઈ નથી. નિષ્ણાતો કહે છે કે ઈરાનને સમજવા માટે આ વૃદ્ધ મહિલા જ પૂરતા છે, જે કોઈ પણ હુમલાખોર દેશ માટે સીધો સંદેશ છે
કે ઈરાનને ન તો કબજે કરી શકાય છે અને ન તો તેને પોતાના ઈશારે ચલાવી શકાય છે. સૈન્ય તાકાત અને હથિયારોના જોરે આ દેશનો સામનો કરવો કેટલો મુશ્કેલ છે તે તો દુનિયા જોઈ જ રહી છે, પરંતુ ૯ કરોડની જનતાને પોતાના પક્ષમાં લાવવી એ તેનાથી પણ મોટો પડકાર છે.સ્થિતિ એવી છે કે અમેરિકા આ જંગમાંથી ગમે તેમ કરીને નીકળવાની પેરવીમાં છે અને ઇસ્લામિક રિવોલ્યુશનને બદલવાનું તેનું સ્વપ્ન હવે સ્વપ્ન જ રહી જશે તેવું લાગી રહ્યું છે, કારણ કે ઈરાનની જનતા મિસાઈલો અને બોમ્બ વચ્ચે પણ નીડર થઈને રસ્તા પર છે. મહિલાઓ હોય કે પુરુષો, દરેક વ્યક્તિ અમેરિકન હિંમત સામે અડીખમ ઉભી છે. જાણકારો કહે છે કે અમેરિકા અને ઈઝરાયેલ હારી ચૂક્યા છે અને ઈરાન હુમલાઓ સહન કરીને તથા પોતાના સુપ્રીમ લીડરને ગુમાવીને પણ જીત તરફ છે, બસ જાહેરાત થવાની બાકી છે. મધ્ય પૂર્વમાં ચાલી રહેલો જંગ હવે વધુ ભયાનક વળાંક લેતો દેખાઈ રહ્યો છે.છેલ્લા ૧૭ દિવસથી ચાલી રહેલા ભીષણ સંઘર્ષ વચ્ચે ઈરાને એક એવો દાવો કર્યો છે જેણે સમગ્ર વિશ્વની ચિંતા વધારી દીધી છે. ઈરાનનું કહેવું છે કે અમેરિકા અને ઈઝરાયેલ વિરુદ્ધ આ જંગમાં
તેને રશિયા અને ચીન તરફથી પણ સૈન્ય સહયોગ મળી રહ્યો છે. જો આ દાવો સાચો સાબિત થાય છે, તો આ સંઘર્ષ માત્ર પ્રાદેશિક યુદ્ધ ન રહેતા વૈશ્વિક શક્તિઓના ટકરાવમાં બદલાઈ શકે છે. ઈરાનના વિદેશ મંત્રી અબ્બાસ અરાગચીએ એક મહત્વના ઈન્ટરવ્યુમાં જણાવ્યું હતું કે ચીન અને રશિયા ઈરાનના વ્યૂહાત્મક ભાગીદારો છે અને વર્તમાન સંઘર્ષમાં સહયોગ કરી રહ્યા છે. બંને દેશો સાથે ઈરાનનો રાજકીય અને આર્થિક સહયોગ તો પહેલેથી જ છે, પરંતુ આ યુદ્ધ દરમિયાન સૈન્ય સ્તરે પણ સમર્થન મળી રહ્યું છે. જોકે, તેમણે આ સહયોગ અંગે કોઈ વિગતવાર માહિતી શેર કરવાનો સ્પષ્ટ ઈન્કાર કર્યો હતો.અરાગચીએ કહ્યું કે વર્તમાન પરિસ્થિતિમાં ઈરાન તેના સહયોગી દેશો સાથે સતત સંપર્કમાં છે અને આ સહયોગ અનેક સ્તરો પર ચાલુ છે. તેમના આ નિવેદન બાદ મધ્ય પૂર્વમાં ચાલી રહેલા સંઘર્ષને લઈને અનેક ચિંતાઓ પેદા થઈ છે, કારણ કે અમેરિકા પહેલેથી જ રશિયા અને ચીનને પોતાના મુખ્ય વ્યૂહાત્મક હરીફ માની રહ્યું છે
. આ અગાઉ અમેરિકી રાષ્ટ્રપતિ ડોનાલ્ડ ટ્રમ્પે એક નિવેદનમાં સંકેત આપ્યો હતો કે રશિયા કદાચ આ યુદ્ધમાં ઈરાનની મદદ કરી રહ્યું છે. ટ્રમ્પે કહ્યું હતું કે રશિયન રાષ્ટ્રપતિ વ્લાદિમીર પુતિન કદાચ થોડી ઘણી મદદ કરી રહ્યા હશે. આ નિવેદન એવા અહેવાલો પછી આવ્યું હતું જેમાં દાવો કરવામાં આવ્યો હતો કે રશિયા ઈરાનને અમેરિકી સૈન્ય ઠેકાણાઓ સાથે જોડાયેલી ગુપ્ત માહિતી આપી રહ્યું છે.દરમિયાન, ઈરાને સ્પષ્ટ કરી દીધું છે કે હાલમાં કોઈ પણ પ્રકારની વાતચીત કે સમજૂતીની શક્યતા નથી. અરાગચીના જણાવ્યા અનુસાર, યુદ્ધનો અંત ત્યારે જ શક્ય છે જ્યારે એ વાતની નક્કર ખાતરી આપવામાં આવે કે ભવિષ્યમાં ઈરાન પર આ પ્રકારના હુમલા ફરીથી કરવામાં આવશે નહીં. તેમણે એમ પણ કહ્યું કે સંઘર્ષ દરમિયાન થયેલા નુકસાન માટે વળતર આપવામાં આવવું જોઈએ. ઈરાની વિદેશ મંત્રીએ પ્રાદેશિક દેશો સાથે મળીને એક સંયુક્ત તપાસ સમિતિ બનાવવાનો પ્રસ્તાવ પણ રજૂ કર્યો છે જે તાજેતરમાં થયેલા હુમલાઓની વિગતવાર તપાસ કરી શકે. તેમનું કહેવું છે કે આનાથી સ્પષ્ટ થઈ શકશે કે કયા કયા સ્થળોને નિશાન બનાવવામાં આવ્યા અને તેની પાછળ કોણ જવાબદાર છે.અરાગચીએ એ વાત પર પણ ભાર મૂક્યો હતો કે ઈરાનની સૈન્ય કાર્યવાહી માત્ર પ્રદેશમાં રહેલા અમેરિકી ઠેકાણાઓ અને હિતો સુધી મર્યાદિત રહી છે.
તેમણે એ આરોપને પણ ફગાવી દીધો હતો કે ઈરાને પડોશી દેશોના નાગરિક વિસ્તારોને નિશાન બનાવ્યા છે. તેમના મતે, કેટલાક આરબ દેશોમાં નાગરિક ઠેકાણાઓ પર થયેલા હુમલા પાછળ ઈઝરાયેલનો હાથ હોઈ શકે છે, જેનો હેતુ માત્ર ઈરાન અને આરબ દેશો વચ્ચેના સંબંધોમાં તિરાડ ઊભી કરવાનો છે. તેમણે બીજો એક મોટો આરોપ લગાવતા કહ્યું કે અમેરિકાએ ઈરાનના શાહિદ ડ્રોનની તર્જ પર ‘લુકાસ’ નામનું ડ્રોન તૈયાર કર્યું છે, જેનો ઉપયોગ આરબ દેશોમાં હુમલા માટે કરવામાં આવ્યો છે. આ સાથે જ અરાગચીએ ચેતવણી આપી છે કે જો ઈરાનના ઊર્જા કેન્દ્રો અથવા તેલ સુવિધાઓને નિશાન બનાવવામાં આવશે, તો તેહરાન તેનો આકરો જવાબ આપશે અને પ્રદેશમાં રહેલી અમેરિકન કંપનીઓના ઠેકાણાઓને પણ નિશાન બનાવી શકાય છે. ઈરાનના આ નિવેદનોએ પહેલેથી જ તણાવપૂર્ણ માહોલને વધુ ગંભીર બનાવી દીધો છે. જો રશિયા અને ચીનનું નામ આ યુદ્ધમાં ખુલ્લેઆમ સામે આવે છે, તો આ ટકરાવ પશ્ચિમ એશિયાની સીમાઓ વટાવીને વૈશ્વિક શક્તિ સંઘર્ષનું રૂપ લઈ શકે છે. તેથી હવે આખી દુનિયાની નજર આ જંગ પર ટકી છે કે આગળ સ્થિતિ કઈ દિશામાં જાય છે.
