આજની આ ફાસ્ટ-ફોરવર્ડ દુનિયામાં રિલેશનશિપ સ્ટેટસને લઈને યુવાનોનો નજરિયો સંપૂર્ણપણે બદલાઈ ચૂક્યો છે. એક સમય હતો જ્યારે 25ની ઉંમર વટાવતા જ લોકો પૂછવા લાગતા કે, લગ્ન ક્યારે છે? પરંતુ આજની પેઢી ‘મિંગલ’ થવાને બદલે ‘સિંગલ’ રહેવાને એક પાવરફુલ ચોઈસ માની રહી છે. લોકો હવે તેને મજબૂરી નહીં, પરંતુ એક લક્ઝરી સમજવા લાગ્યા છે. પરંતુ આખરે એવું તે શું થયું કે, ‘એકલતા’ હવે ‘આઝાદી’ લાગવા માંડી છે? ચાલો વિગતવાર એ કારણોને સમજીએ જે આજના યુવાનોની વિચારસરણી દર્શાવે છે.
પોતાની શરતો પર જિંદગી: મનોવૈજ્ઞાનિકોના મતે, સિંગલ રહેવાનું સૌથી મોટું આકર્ષણ ‘પર્સનલ ફ્રીડમ’ છે. આજના લોકો પોતાની મરજીના માલિક બનવા માંગે છે. સવારે કેટલા વાગ્યે ઉઠવું, વીકેન્ડ પર શું ખાવું અને રાત્રે કયા સમયે ઘરે આવવું. આ નાના-નાના નિર્ણયો માટે કોઈને જવાબ ન આપવો એ એક જબરદસ્ત માનસિક શાંતિ આપે છે. આ આઝાદી તેમને પોતાની જાતને વધુ સારી રીતે સમજવાની તક આપે છે.
લક્ષ્ય પહેલા, સંબંધ પછી: વધતી જતી હરીફાઈ અને કોર્પોરેટ જગતના દબાણને કારણે યુવાનો હવે પોતાના કરિયરને લઈને ખૂબ જ ગંભીર છે. સંશોધનો દર્શાવે છે કે, ઘણા લોકો પોતાની ઊર્જા સંબંધોના ભાવનાત્મક ઉતાર-ચઢાવમાં ખર્ચવાને બદલે પ્રોફેશનલ ગ્રોથમાં લગાવવાનું વધુ યોગ્ય સમજે છે. તેમના માટે પોતાની ઓળખ બનાવવી અને આર્થિક રીતે મજબૂત થવું એ કોઈ પણ સંબંધ કરતા વધુ જરૂરી બની ગયું છે.
પૈસા પર માત્ર પોતાનો હક: આર્થિક સ્વતંત્રતાએ સંબંધોના સમીકરણો બદલી નાખ્યા છે. ખાસ કરીને મહિલાઓમાં આ મોટો ફેરફાર જોવા મળ્યો છે. હવે લગ્ન કે પાર્ટનર સુરક્ષાનું એકમાત્ર સાધન રહ્યા નથી. લોકો પોતાની મહેનતની કમાણીનો આનંદ એકલા લેવા માંગે છે. તેઓ પોતાની પસંદગી મુજબ રોકાણ કરવું અથવા મોંઘા ગેજેટ્સ અને કપડાં ખરીદવાનું પસંદ કરે છે, એ ચિંતા વગર કે, તેમના પાર્ટનરનો આ બાબતે શું અભિપ્રાય હશે.
શાંતિ હવે પહેલી પ્રાથમિકતા: રિલેશનશિપ એક્સપર્ટ્સનું માનવું છે કે, ‘ટોક્સિક’ સંબંધો અથવા દર્દનાક બ્રેકઅપના અનુભવો લોકોને અંદરથી હચમચાવી દે છે. આવા અનુભવો પછી, લોકો ફરીથી એ જ ઇમોશનલ ડ્રામા અને તણાવમાં પડવા માંગતા નથી. તેમના માટે હવે ‘શાંતિ’ કોઈ પણ રોમેન્ટિક સંબંધ કરતા વધુ કિંમતી થઈ ગઈ છે. તેઓ ‘એકલા રહેવા’ને ‘દુઃખી થવા’ કરતા ક્યાંય વધુ સારો વિકલ્પ માને છે
