એક્ટર રાજેન્દ્ર કુમારના પત્ની અને એક્ટર કુમાર ગૌરવના માતા શુક્લા કુમારનું તાજેતરમાં નિધન થયું છે. આ માહિતી બુધવારે સામે આવી છે. પરિવારના જણાવ્યા અનુસાર, તેમની પ્રેયર મીટ 10 જાન્યુઆરીએ યોજાશે. આ માહિતી બોલિવૂડ હંગામાએ તેના રિપોર્ટમાં સૂત્રોને ટાંકીને આપી છે. હાલમાં તેમના નિધનના કારણો જાણી શકાયા નથી.
શુક્લા કુમાર લાઇમલાઇટથી દૂર રહેતા હતા અને તેઓ ભાગ્યે જ જાહેર કાર્યક્રમોમાં જોવા મળતા હતા. જોકે, તેઓ હિન્દી સિનેમાના એક પ્રતિષ્ઠિત ફિલ્મ પરિવારના મહત્વના સભ્ય હતા. રાજેન્દ્ર કુમાર સાથે લગ્ન કર્યા પછી, તેમણે તેમની આખી ફિલ્મી સફરને નજીકથી જોઈ હતી. બંનેને ત્રણ બાળકો હતા, જેમાં એક પુત્ર કુમાર ગૌરવ અને બે પુત્રીઓ ડિમ્પલ અને મનોરમાનો સમાવેશ થાય છે.
રાજેન્દ્ર કુમારની વાત કરીએ તો તેમને ફિલ્મ ઇન્ડસ્ટ્રીમાં જુબિલી કુમારના નામથી ઓળખવામાં આવતા હતા. તે સમયે તેમની ફિલ્મોએ સતત બોક્સ ઓફિસ પર સફળતા મેળવી હતી. તેમની ઘણી ફિલ્મો સિનેમાઘરોમાં ઓછામાં ઓછા 25 અઠવાડિયા (સિલ્વર જ્યુબિલી) સુધી ચાલી હતી.
તેમની પ્રખ્યાત ફિલ્મોમાં ગૂંજ ઉઠી શહનાઈ, દિલ એક મંદિર, મેરે મહેબૂબ, સંગમ અને આરઝૂનો સમાવેશ થાય છે.રાજેન્દ્ર કુમારનું નિધન 12 જુલાઈ 1999ના રોજ થયું હતું. તેમનું મૃત્યુ હાર્ટ એટેકથી થયું હતું. તે સમયે તેઓ કેન્સર સામે પણ ઝઝૂમી રહ્યા હતા.
જ્યારે, શુક્લા કુમારના પુત્ર કુમાર ગૌરવે વર્ષ 1981માં ફિલ્મ ‘લવ સ્ટોરી’થી હિન્દી સિનેમામાં પ્રવેશ કર્યો હતો. આ તેમની પહેલી જ ફિલ્મ હતી અને સુપરહિટ સાબિત થઈ. વિજેતા પંડિત સાથે તેમની જોડીને દર્શકોએ પસંદ કરી હતી. આ ફિલ્મ પછી તેઓ રાતોરાત સ્ટાર બની ગયા હતા. આ પછી તેઓ ‘તેરી કસમ’, ‘સ્ટાર’, ‘નામ’ અને ‘કાંટે’ જેવી ફિલ્મોમાં જોવા મળ્યા. જોકે, તેમની પછીની ફિલ્મો ‘લવ સ્ટોરી’ જેવી હિટ ન થઈ.
