દિગ્ગજ અભિનેતા ધર્મેન્દ્રની છેલ્લી ફિલ્મ 21 એ સૌના દિલ જીતી લીધા છે. ફિલ્મને દર્શકો તરફથી સકારાત્મક પ્રતિસાદ મળી રહ્યો છે. તાજેતરમાં આ ફિલ્મના કોરિયોગ્રાફર વિજય ગાંગુલીએ શૂટિંગ દરમિયાનનો એક યાદગાર પ્રસંગ શેર કર્યો છે.
ધર્મેન્દ્રના એક ડાન્સ સિક્વન્સ વિશે વાત કરતાં વિજય ગાંગુલીએ જણાવ્યું કે શારીરિક તકલીફ હોવા છતાં ધર્મેન્દ્રે પોતે જ સ્ટેપ્સ કરવાનો નિર્ણય લીધો હતો. પિંકવિલાને આપેલા ઇન્ટરવ્યૂમાં તેમણે કહ્યું કે તે સમય રાત્રે લગભગ 2:30 થી 3:00 વાગ્યાનો હતો.
અમે ધર્મેન્દ્રને કહ્યું હતું કે તેમને માત્ર થોડું ડાન્સ કરવાનું છે અને તેઓ જે ઇચ્છે તે કરી શકે છે.પરંતુ ધર્મેન્દ્રે પૂછ્યું કે બીજા લોકો શું કરી રહ્યા છે. અમે તેમને બતાવ્યું કે બીજા કલાકારો એકબીજાના ખભા પર હાથ રાખીને પગથી એક સ્ટેપ કરી રહ્યા હતા. ત્યારે તેમણે પૂછ્યું, હું આ કેમ નથી કરી શકતો?
વિજય ગાંગુલીએ આગળ કહ્યું કે ધર્મેન્દ્ર સ્ટેપ્સ કરવા પર અડગ રહ્યા. તેઓ બેઠા હતા કારણ કે વારંવાર ઊભા થવું તેમના માટે થોડું મુશ્કેલ હતું. તેમ છતાં તેઓ ઊભા થયા અને ડાન્સ કર્યો. અંતે અમે તેમને કહ્યું કે એવું ન કરે, કારણ કે જો રિટેક લેવી પડે તો તે તેમના માટે શારીરિક રીતે થકાવનારી બની શકે. સચ્ચાઈ એ છે કે તે સમયે ડાન્સ કરવો તેમના પાત્ર માટે ખાસ જરૂરી પણ નહોતો.
પરંતુ વ્યક્તિગત રીતે ધર્મેન્દ્રની વિચારધારા એવી હતી કે તેમને પોતાનું 100 ટકા આપવું છે. તેમને એવું પણ લાગતું હતું કે કોઈ એવું ન વિચારે કે તેઓ આ કરી શકતા નથી. આ માટે તેમણે સાબિત કરીને બતાવ્યું કે તેઓ કરી શકે છે. એ ક્ષણ જોઈને અમે સૌ વિચાર્યું, વાહ, આ તો ખરેખર શાનદાર છે.
