દિલ્હીમાં સોમવારે મોડી સાંજે લાલ કિલ્લા પાસે કાર વિસ્ફોટ થયો હોવાનું જાણવા મળ્યું છે. જેમાં આઠ લોકોનાં મોત નીપજ્યા છે અને આશરે ૨૦ લોકો ઘાયલ થયા છે. ઘાયલોને એલએનजेपी હોસ્પિટલમાં સારવાર માટે ખસેડવામાં આવ્યા છે.ગઇકાલે મોડી સાંજે આ વિસ્ફોટ બાદ સતત નવી તસવીરો અને નવી થિયરીઓ સામે આવી રહી છે. હાલ અમારી પાસે એક CCTV ફૂટેજ આવ્યો છે જે વિસ્ફોટ પહેલાંનો હોવાનું કહેવાય છે.
ખૂફિયા સૂત્રોના જણાવ્યા અનુસાર, આ કારનો મૂળ માલિક મોહમ્મદ સલમાન હતો. ત્યારબાદ આ કાર ઘણા લોકોના હાથેથી પસાર થઈ હતી — પહેલા નદીમે ખરીદી, પછી ફરીદાબાદના રોયલ કાર ઝોનમાં વેચાઈ, ત્યાંથી પુલવામાના તારિકે ખરીદી અને છેલ્લે ડૉક્ટર ઉમર મોહમ્મદ પાસે પહોંચી.ઉમર મોહમ્મદ એ જ વ્યક્તિ છે જે ફરીદાબાદ કેસમાં વૉન્ટેડ હતો — એ જ કેસ જેમાં પોલીસને ૨૯૦૦ કિલો વિસ્ફોટક સામગ્રી મળી આવી હતી.
સૂત્રો કહે છે કે, મુજમ્મિલની ધરપકડ બાદ ઉમર ડરી ગયો હતો અને તેણે લાલ કિલ્લા નજીક આ આત્મઘાતી હુમલો કર્યો હશે. હાલ ત્યાંથી મળેલા શરીરના અવશેષોનું ડીએનએ ટેસ્ટિંગ કરવામાં આવશે જેથી ખાતરી થઈ શકે કે કાર ચલાવતો વ્યક્તિ ઉમર મોહમ્મદ જ હતો કે નહીં.આ તમામ માહિતી હાલ સુધી સૂત્રોના આધારે છે — પોલીસ અથવા અન્ય સુરક્ષા એજન્સી તરફથી કોઈ સત્તાવાર પુષ્ટિ કરવામાં આવી નથી
.આ ઘટનાને પગલે ગૃહમંત્રી અમિત શાહની અધ્યક્ષતામાં એક ઉચ્ચસ્તરીય બેઠક બોલાવવામાં આવી છે જેમાં આઇબી ચીફ, ગૃહસચિવ, દિલ્હી પોલીસ કમિશનર અને અન્ય ઉચ્ચ અધિકારીઓ હાજર રહેશે.લાલ કિલ્લા પાસેનું સ્થાન, જ્યાં વિસ્ફોટ થયો, તે ખૂબ જ ભીડભાડવાળો વિસ્તાર છે — ચાંદની ચોક અને લાલ કિલ્લા વચ્ચેની મુખ્ય માર્ગ પર આ ઘટના બની છે. સામાન્ય દિવસોમાં પણ અહીં ટ્રાફિક બહુ ભારે રહે છે.હાલમાં વિસ્ફોટના કેટલાક વીડિયો અને CCTV ફૂટેજ બહાર આવ્યા છે જેમાં એક વ્યક્તિ કારમાં બેઠો જોવા મળે છે. માનવામાં આવે છે કે એ જ વ્યક્તિ ઉમર મોહમ્મદ હોઈ શકે છે. તપાસ ચાલુ છે અને નવી માહિતી મળતાં જ જાહેર કરવામાં આવશે.
