વર્ષ 2016માં અમદાવાદમાં એક યુવકનું જીવન અચાનક ખતમ થાય છે. આ યુવકનો ભાઈ માથામાં ચોટી બાંધીને નક્કી કરે છે કે જ્યાં સુધી પોતાના ભાઈને થયેલા અન્યાયનો જવાબ નહીં મળે ત્યાં સુધી ચોટી નહીં કપાવશે.
લગભગ નવ વર્ષ બાદ, ઘટનામાં સંડોવાયેલા વ્યક્તિ પર નજર રાખવામાં આવે છે અને યોગ્ય તક મળતા જ પાલડી વિસ્તારમાં તેના પર ગંભીર પ્રહાર કરવામાં આવે છે.બે દિવસ પહેલા બનેલી આ ઘટનાએ સમગ્ર અમદાવાદમાં ભારે ચર્ચા જગાવી હતી. પોલીસે ઝડપી કાર્યવાહી કરતા કુલ સાત લોકોને કસ્ટડીમાં લીધા છે. ત્રણ લોકો રાજસ્થાનના આબુમાંથી ઝડપાયા હતા,
જ્યારે બાકીના ચાર લોકોને અમદાવાદ અને ગાંધીનગરમાંથી કાબૂમાં લેવામાં આવ્યા હતા.ઝોન-7 ડીસીપી શિવમ વર્માએ જણાવ્યું હતું કે 12 સપ્ટેમ્બરની સવારે લગભગ 4:30 વાગ્યે પાલડી વિસ્તારના ભઠ્ઠા નજીક આ બનાવ બન્યો હતો. અજય ઠાકોર નામનો મુખ્ય આરોપી છે, જેના ભાઈનું 2016માં જીવલેણ ઝઘડામાં નિધન થયું હતું.
ત્યારથી તે મનમાં પ્રતિજ્ઞા બાંધી બેઠો હતો. છેલ્લા ત્રણ-ચાર દિવસથી તેની ટીમે આયોજન કરીને રેકી શરૂ કરી હતી. 11 સપ્ટેમ્બરની રાત્રે મિત્રના ઘરે બેઠક કરીને અંતિમ પ્લાન બન્યો હતો.રાત્રે દોઢ વાગ્યે નૈસલ ઠાકોર પારડી વિસ્તારમાં હોવાની માહિતી મળતાં આરોપીઓ તેની ઉપર નજર રાખવા પહોંચ્યા હતા
અને સવારે ચાર વાગ્યાની આસપાસ અચાનક હુમલો કર્યો. બાદમાં બધા આરોપીઓ મકરબા તરફ ભાગી ગયા. પોલીસ ટીમોએ ઝડપી કામગીરી કરીને બે દિવસની અંદર જ બધા આરોપીઓને પકડી પાડ્યા.આ ઘટનાએ સુરક્ષા વ્યવસ્થાઓ પર પણ સવાલો ઊભા કર્યા છે, પરંતુ પોલીસની ઝડપી કાર્યવાહીથી આરોપીઓ કાનૂની ઘેરામાં આવી ગયા છે.
